കൊച്ചി: സോഷ്യൽ മീഡിയയിൽ വലിയ രീതിയിൽ പ്രചരിച്ച തന്റെ എഐ വീഡിയോ മെറ്റ നീക്കം ചെയ്ത സംഭവത്തിൽ പ്രതികരണവുമായി മുഖ്യമന്ത്രി വി.ഡി. സതീശൻ. വീഡിയോ വ്യക്തിപരമായി തനിക്ക് ഏറെ സന്തോഷം നൽകിയതാണെങ്കിലും, അതിൽ നിയമപരമായ പ്രശ്നങ്ങളുണ്ടായിരുന്നുവെന്ന് അദ്ദേഹം വ്യക്തമാക്കി. അഞ്ചു വയസ്സുള്ള കുട്ടി തന്നോട് ഡാൻസ് നന്നായിരുന്നു എന്ന് പറഞ്ഞെന്നും മുഖ്യമന്ത്രി വ്യക്തമാക്കി.
തന്റെ എഐ വീഡിയോ സംബന്ധിച്ച് നേരത്തെയും രസകരമായ പ്രതികരണം നടത്തിയിട്ടുള്ള മുഖ്യമന്ത്രിയുടെ പുതിയ പരാമർശവും ശ്രദ്ധ നേടുകയാണ്.
'വീഡിയോ കണ്ട് ഞാൻ തന്നെ ഞെട്ടിപ്പോയി. ഞാൻ ഒരു ഗ്രൂപ്പ് ഡാൻസ് ലീഡ് ചെയ്യുകയാണ്. ഗംഭീര ഡാൻസ്. മോഹൻലാലിനേയും എന്റെ സ്നേഹിതൻ തമിഴ്നാട് മുഖ്യമന്ത്രി വിജയ്യേയും ഞെട്ടിക്കുന്ന ഡാൻസാണ് ഞാൻ നടത്തിയത്. കുറച്ച് പരിഹസിക്കുന്നതിനു വേണ്ടി കൂടിയാണ് ചെയ്തതെങ്കിലും എനിക്ക് സന്തോഷമായി.'
'ഒരു അഞ്ചു വയസ്സുള്ള കുട്ടി എന്റെ അടുത്ത് വന്നിട്ട് പറഞ്ഞു, 'സാറിന്റെ ഡാൻസ് ഗംഭീരമായി' എന്ന്. ഞാൻ ശരിക്കും ഡാൻസ് ചെയ്തതാണെന്നാണ് ആ കുട്ടി വിചാരിച്ചിരിക്കുന്നത്. ആർട്ടിഫിഷ്യൽ ഇന്റലിജൻസ് ഉപയോഗിച്ച് ഇങ്ങനെ കാര്യങ്ങൾ ക്രിയേറ്റ് ചെയ്യുകയാണ്. അവിടെ നിയമപ്രശ്നങ്ങളുണ്ട്.' -മുഖ്യമന്ത്രി പറഞ്ഞു.
